پیشو
لنډه کیسه تېره شپه مې د کافکا د هغه ناول وروستۍ پاڼه ولوسته چې انسان پکې حشره شي، په ځای کې پروت وم په ناول مې فکر کاوه چې له انسانه حشره جوړېدل لویه غمیزه ده که د حشرې له سترګو د نورو انسانانو لیدل یې ډېر دردونکي دي. سترګې مې درنې شوې. په خوب کې زه پیشو شوی وم. ځان مې د پیشو و، خو زړه او ذهن مې د انسان و. په خبره پوهېدم، احساس مې کاوه، فکر مې کاوه، خو غږ مې نه شوای کولی، څوک مې په خبره نه شوای پوهولی. نورو د انسان په سترګه نه راته کتل، پیشو یې بللم. کله چې به کوم انسان یوازې و، په ملا به مې د پوست رغوی لمس احساس کړ، مینه یې راسره کوله خو چې په غوسه به شول، لغته به یې راکوله، ځان ته یې دا حق ورکاوه چې غوسه تر کمزوري وباسي. په یوه کور کې وم. ماشومانو لوبې کولې، ګل یې په توپ مات کړ. د ګل ماتېدل د ماشومانو کار و، خو د کور خاوند خپل قهر له ما ویوست. هماغه توپ یې ورپورته کړ چې ماشومانو پرې ګل مات کړی و، پر ما یې وار وکړ. ما چیغه وهله، خو غږ مې د میو تر حده بند پاتې و. پوه شوم که انسانان زور ولري، سترګې یې پټې شي ، که کمزوری مخې ته ورشي، خپله غوسه پرې باسي. کله چې راویښ شوم، زړه مې لا هم دربېده. خپلې انا ته لاړم، خوب مې ورته ووایه. هغې راته ډېر څه ونه ویل. یوازې دومره یې وویل: – خدای دې د ظالم له زوره، له ناحقه توره وساته. د کافکا کتاب مې له المارۍ راواخیست ، بل ځای مې کېښود. اوس په المارۍ کې هغه ځای تش دی. هر وار چې المارۍ ته ګورم، هغه تش ځای د پیشو سترګې را یادوي، هغه پیشو چې انسان وه، خو چا انسان نه بلله. په دې فکر کوم چې یا باید بل کتاب راوړم چې دغه تشه ډکه کړي، یا ټوله المارۍ لیرې کړم. که ځای تش پاتې شي، بل کتاب به پرې راړنګ شي، که نه شي تل به د کافکا حشره او د خوب پیشو رایادوي. چې کوم یو به یې ډېر ځورونکی وي؟ لیکوال: ایمل پسرلی
په خوست ولایت کې د افغان ویاړ څانګې لپاره د مسؤول ټاکل کېدل
ښاغلی سیف الرحمن مشال یو ژمن او وړ شخصیت دی چې د علم، ادب او ټولنیزو خدمتونو په برخه کې یې ارزښتناک فعالیتونه ترسره کړي دي، نوموړی د اسلامي ارښتونو، ملي هویت او فکري ودې د پیاوړتیا لپاره تل هڅاند پاتې شوی دی. موږ باور لرو چې د ده په مسؤولیت سره به د خوست ولایت په کچه د علمي، کلتوري او ټولنیزو فعالیتونو نوی باب پرانیستل شي او د ځوانانو د فکري او علمي ودې لپاره به مهم ګامونه پورته شي. له لوی خدای (ج) څخه ورته په دې درانه مسؤولیت کې د لا زیاتو بریاوو هیله لرو. په درنښت افغان ویاړ اداره
نړۍ کې تر ټولو ډېر خپرېدونکې مجلې
ژباړه: احسان الله تکل ۱۰- ګېم اېنفورمر (Game Informer) وېش (توزیع): ۴.۳ میلیونه نسخې دا مجله د ویډیویي لوبو د صنعت یو لوی او پرمختللی سوداګریز سکتور دی او د دې لوبو مینهوال تل غواړي د خپلې خوښې د لوبو او وسایلو په اړه له نویو معلوماتو خبر شي، د امریکا «ګېم اېنفورمر» مجله هره میاشت د دغو غوښتنو پوره کولو هڅه کوي. ۹- نېشنل جیوګرافیک (National Geographic) وېش (توزیع): ۴.۴ میلیونه نسخې «نېشنل جیوګرافیک» د نېشنل جیوګرافیک ټولنې رسمي خپرونه ده، چې له (۱۸۸۸م) کال راهیسې په منظم ډول خپرېږي، یعنې د ټولنې له جوړېدو یوازې نهه میاشتې وروسته پیل شوه. دا مجله بېلابېل موضوعات خپروي لکه ساینس، حیوانات، چاپېریال، فضا او طب. ۸- ټي وي مېګازین (TV Magazine) وېش (توزیع): ۵.۸ میلیونه نسخې «ټي وي مېګازین» یوه اوونیزه مجله ده چې د فرانسې د ټلویزیوني پروګرامونو په اړه مطالب خپروي، دا مجله د Le Figaro Group پورې اړه لري، په ۱۹۸۷ کال کې پیل شوې او د «هاشېت فیلیپاشي» شرکت یې چاپ او وېش پر غاړه لري. ۷- سپورټس الیسټرېټډ (Sports Illustrated) وېش (توزیع): شپږ میلیونه نسخې دا یوه مجله ده چې د بېلابېلو موضوعاتو په ځانګړي ډول د سپورټ او موټرو اړوند مطالب خپروي او شاوخوا شپږ میلیونه نسخې وېشل کېږي. ۶- ریډرز ډایجسټ (Reader’s Digest) وېش (توزیع): له شپږ میلیونو څخه زیاتې نسخې «ریډرز ډایجسټ» مجله د DeWitt Wallace او Lila Bell Wallace له خوا په ۱۹۲۰ کال کې تاسیس شوې ده، دا مجله ټولنیز او کورني موضوعات تر بحث لاندې نیسي او خپل مرکزي دفتر یې له «چاپاکوا» څخه د New York City «منهټن» ته انتقال کړی دی. ۵- بیټر هومز اېنډ ګارډنز (Better Homes and Gardens) وېش (توزیع): له اوو میلیونو څخه زیاتې نسخې د Meredith Corporation شرکت دا مجله هره میاشت خپروي، دا په ۱۹۲۲ کال کې د Edwin Meredith له خوا تاسیس شوې، چې د Woodrow Wilson د واکمنۍ پر مهال د کرنې وزیر و. ۴- کوسټکو کنکشن (The Costco Connection) وېش (توزیع): اته میلیونه نسخې «کوسټکو کنکشن» یوه وړیا مجله ده چې د Costco شرکت ټولو غړو ته لېږل کېږي، دا په ۱۹۸۷ کال کې تاسیس شوې او د چاپېریال، روغتیا او پخلي په څېر بېلابېل موضوعات خپروي. ۳- اډاک موټور وېلټ (ADAC Motorwelt) وېش (توزیع): له ۱۳ میلیونو څخه زیاتې نسخې «اډاک موټور وېلټ» یوه جرمني مجله ده چې هره میاشت خپرېږي او د موټرو او سیاحت په برخه کې تخصص لري، د دې مرکزي دفتر د Munich په ښار کې دی او په ۱۹۲۵ کال کې تاسیس شوې ده. ٢- ای.ای.آر.پي مجله (AARP The Magazine) وېش (توزیع): له ۲۳ میلیونو څخه زیاتې نسخې «ای.ای.آر.پي» یوه امریکایي مجله ده چې په ۱۹۵۸ کال کې تاسیس شوې ده، هره دوه اوونۍ خپرېږي او د AARP له خوا خپرېږي، دا مجله تر ۲۰۰۲ کال پورې د «Modern Maturity» په نوم پېژندل کېده. ۱- واچ ټاور (The Watchtower) وېش (توزیع): ۵۰ میلیونه نسخې «واچ ټاور» یوه دیني مجله ده چې هره دوه اوونۍ شاوخوا ۵۵ میلیونه نسخې وېشل کېږي، د دې لومړۍ ګڼه په ۱۸۷۹ کال کې په متحده ایالاتو کې خپره شوې او دا مهال له ۳۰۰ څخه په زیاتو ژبو خپرېږي.