چهارشنبه، ۱۴۴۸/۲/۱۴ هـ.ق ـ ۱۴۰۵/۵/۷ هـ.ش
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د چهارشنبې ورځ وه؛ پر خوست تېز باران وریده، د باران شدت د غونډې د ګډونوالو د راتګ مخه ونه نیوه. عالمان، فرهنګي شخصیتونه او ځوانان د یوې داسې موضوع پر محور سره راټول وو چې د ټولنې له ناوړه دودونو، کورنیو چارو او ورځني ژوند سره یې نېغه اړیکه لرله.
د افغان ویاړ څېړنیزې او کلتوري ټولنې ـ خوست څانګې او د خوست د اطلاعاتو او کلتور ریاست د ځوانانو چارو آمریت په ګډو هڅو، د عالیقدر امیرالمؤمنین حفظه الله د ۱۷مې ګڼې فرمان د لا ښه تطبیق او همغږۍ په موخه دغه غونډه جوړه شوې وه.
غونډه د قاري سلیمان خاکسار له خوا د قرآن کریم د څو مبارکو آیتونو په تلاوت پیل شوه. له تلاوت وروسته په خوست کې د افغان ویاړ څېړنیزې او کلتوري ټولنې مسؤول او استازی سیفالرحمن مشال د ښه راغلاست او پرانیستې وینا لپاره دریځ ته وبلل شو.
ښاغلي مشال د سخت باران باوجود د ګډونوالو راتګ وستایه او له هغوی یې مننه وکړه. نوموړي وروسته د ۱۷مې ګڼې فرمان پر بېلابېلو اړخونو خبرې وکړې او په ځانګړي ډول یې په بدو کې د نجونو ورکړه، بېځایه لګښتونه او یو شمېر نور ناوړه دودونه د بحث محور وګرځول.
د غونډې ویناوې یوازې د ستونزو تر یادولو محدودې نه شوې؛ د حل مسؤولیت او عملي اقدام غږ هم ورسره مل و. د ځوانانو چارو آمر مولوي اسحاق عمري د اطلاعاتو او کلتور ریاست په استازیتوب د افغان ویاړ څېړنیزې او کلتوري ټولنې له ادارې مننه وکړه او د ورته نورو علمي او عامه پوهاوي پروګرامونو د دوام غوښتنه یې وکړه.
نوموړي ځوانان وهڅول چې د فرمان د ښه تطبیق لپاره په خپلو سیمو کې ناستې وکړي او د ټولنې د غړو په توګه د ناسمو دودونو د له منځه وړلو هڅه له خپلو کورونو او چاپېریال څخه پیل کړي.
د غونډې په بله برخه کې د خوست د اطلاعاتو او کلتور ریاست پخوانی رئیس او د ګڼو اثارو لیکوال عبدالکریم پتنګ دریځ ته وبلل شو. هغه د غونډو او بحثونو ترڅنګ پر عملي اقدام ټینګار وکړ او ویې ویل چې که عالمان، خطیبان او قومي مشران په خپله د اصلاح په لاره کې مخکښ شي، د ټولنې نور خلک به هم په اسانه ورپسې ګام واخلي.
په دې توګه پیل شوې ناسته د ویناو، پوښتنو او د ټولنیز مسؤولیت د احساس په فضا کې مخته ولاړه؛ هغه پیغام چې د غونډې له بېلابېلو ویناوو راوت دا و چې د ناسمو دودونو اصلاح یوازې په فرمان او وینا نه بشپړېږي، بلکې عملي بدلون د فرد، کورنۍ او ټولنې له ګډ مسؤولیت څخه پیلېږي.
د غونډې د دریځ چارې قاري محمد زمان حقیار پر مخ یووړې.
