افغان ویاړ څېړنیز او کلتوري بنسټ
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د پشهیي ژبې د الفبا اصلاح او تصویب د افغانستان د ژبني او فرهنګي میراث د ساتنې او معیاري کولو په لاره کې یو ارزښتناک او تاریخي ګام دی، دا اقدام د پشهیي ژبې د لیکدود د یووالي او علمي ودې لپاره مهم بنسټ برابروي او همدارنګه د هېواد د ژبني تنوع د درناوي او پیاوړتیا کې هم مهم رول لوبوي.
افغان ویاړ د افغانستان د علومو اکاډمۍ دغه علمي او ملي اقدام په تودو الفاظو هرکلی کوي او د هغو ټولو استادانو، څېړونکو، ژبپوهانو او متخصصینو هڅې ستایي چې د پشهیي ژبې د الفبا د اصلاح او معیاري کولو لپاره یې نه ستړې کېدونکې هلې ځلې کړې دي.
موږ باور لرو چې د هرې ژبې معیاري کېدل د هغې د بقا، پرمختګ او علمي ودې بنسټ جوړوي، پشهیي ژبه د افغانستان د فرهنګي هویت یوه ارزښتناکه برخه ده او د هغې پیاوړتیا د ټول هېواد د فرهنګي شتمنۍ پیاوړتیا ده.
هېله ده چې لیکوالان، ښوونکي، رسنۍ، فرهنګیان او د پشهیي ژبې ټول ویونکي له دې اصلاح شوې الفبا څخه په پراخه کچه ګټه واخلي، څو دا لرغونې ژبه د علم، ادب او معاصرې لیکنې په ډګر کې لا پیاوړې او غوړېدلې شي.
افغان ویاړ د هېواد د ټولو ژبو د ودې، معیاري کېدو او فرهنګي ارزښتونو د ساتنې لپاره د هر ډول علمي او ملي نوښت ملاتړ کوي.
په درنښت د افغان ویاړ څیړنیزه او کلتوري ټولنه
کابل – افغانستان
